Pagi-pagi Mat Buluk udah uring-uringan. Kelakuannye jadi begitu lantaran pas diperiksa, dikantong celananye yang ada cuma duit gocengan doang.
“ Ini pasti kerjaan tuyul perempuan ! ” Kata Mat Buluk sembari celingukan nyariin bininye. Tapi orang yang dicari kagak ketahuan batang idungnye.
“ Imah... Enyak lo ada dimane ? ”, tanya Mat Buluk rada ngotot sambil matanya ngelirik ke arah dapur.
“ Lagi kewarung..” jawab anak bontotnye yang lagi masak. “ Pagi-pagi udah teriak-teriak... emangnye ada apaan, Be ? ” lanjutnya.
Sambil garuk kepalanya yang botak, Mat Buluk ngomong masih setengah sewot : “ Enyak lo kebiasaanye ngambil duit kagak bilang-bilang. Udah sering gue antepin, eeh.. malah jadi keenakan ”
Tunggu punya tunggu akhirnya mpok Jenab nongol juga dan langsung diinterogasi soal duit yang ngilang tadi.
Bini Mat Buluk ngejawab : “ Dua puluh ribuannye emang aye yang ambil, terus abang kan tau sendiri kalo utang kita di warungnye udah kelewat numpuk, kalo kagak dicicil kaya gini, gimane cara ngelunasinnye ? “.
Mat Buluk nggak mau kalah ngomong : “Tapi bukan begitu caranye. Itu duit sengaja gue sisain bakal keperluan gue. Lagian perkara utang kite, gue kan pernah ngomong sama Uda Lukman, dan die maklumin keadaan kite “.
“ Terang aje, abang kan lelaki, jadi bisa cuek kaya gitu “, bales mpok Jenab, “ Tapi aye kan malu bang, kemaren aje kalo kagak kepaksa banget, aye ogah utang lagi sama die ”, sambung bininye.
“ Dasar perempuan, gede kemaluannye ! ”, kata Mat Buluk sambil ngeloyor keluar rumah nyamperin Bajaj-nye dan langsung tancep gas.
Ini hari Mat Buluk kepaksa kudu ngotot nyari penumpang. Bukan ape-ape, sebelon jam 11 siang dia kudu dapetin duit buat masang lotere buntut. Kalo duit yang tadi masih ada, kan tinggal nyari separonye lagi. Emang buat die, hobi yang satu ini udah mendarah daging betul.
Kebiasaan ngutak-atik kode angka terus dilakonin dari masih bujangan sampe dua anaknye udah pada gede -gede. Dari jaman ke jaman judi lotere gelap namanya boleh ganti-ganti, tapi buat Mat Buluk kagak ada masalah dia tetap setia.
Apalagi sekarang, gara-gara pernah tembus satu jute setengah dari lotere buntut. yang cuma sekali-kalinya itu aje. Mat Buluk jadi tambah semangat lagi. Paling kagak empat puluh ribu perak diada-adain buat sekali masang.
Padahal judi yang kaya gitu saban minggu ade 2 periode pemasangan. Alhasil kesimpulannye dalam sebulan, duit yang kudu disiapin buat masang lotere buntut kira-kira hampir seprapat jute.
Dari gambaran cerite barusan, jelas bahwa sebagian masyarakat kite sebetulnye bukan orang melarat. Buktinye Mat Buluk. Biar kerjaannya cuma sopir Bajaj, tapi die masih punya uang lebih buat dihambur-hamburin yang kagak jelas juntrungannye.
Apalagi pas dipikir-pikir, sebetulnye perbuatan itu justru ngasih peluang bandar-bandar judi jadi tambah tajir. Hebat kan kite ?!!
.jpg)
